Ignacio Iglesias, concelleiro de Benestar, recolleu esta mañá en Oviedo o recoñecemento outorgado ao Concello de Teo por parte de Unicef como Cidade Amiga da Infancia. No acto estivo acompañado da técnica do departamento, Eva López. Esta distinción recoñece o traballo realizado polo Concello e centralizado na área de Benestar coa mocidade e a infancia do municipio.
 

A corporación teense reúnese este mércores 27 na sesión ordinaria de novembro. O debate plenario terá lugar en horario de tarde, ás 20:00 horas, no Salón de Plenos da Casa Consistorial, na Ramallosa, co fin de facilitar a asistencia das persoas interesadas. A sesión tamén se retransmitirá por streaming a través da web municipal.

Ademais de votar varias mocións do BNG tamén se realiza a comparecencia do concelleiro Xurxo Francos en relación coas lombas en diferentes vías do Concello.

O Concello rematou as obras para acondicionar a antiga escola unitaria de Solláns como un espazo de traballo colaborativo ou ‘coworking’. O edificio ten así un novo uso por parte de persoas emprendedoras, autónomas ou startups que estean iniciando ou consolidando un proxecto empresarial e tamén por parte das entidades do tecido asociativo que promovan e divulguen os recursos do territorio e as actividades do agro. Acolle tamén actividades de formación de tecnoloxías de información e da comunicación.

Achégase a conmemoración do 25 de novembro, Día Internacional da Eliminación da Violencia contra a Muller. A violencia de xénero é un problema que, lonxe de solucionarse, segue a medrar na sociedade. Teo non é unha illa nesta cuestión e tamén no seu termo municipal existen realidades duras e moitas veces de difícil diagnose.

O festival Titiriberia. Olladas sobre os cristovos, organizado pola Asociación Cultural Morreu o Demo para o Concello de Teo e coa colaboración da Deputación da Coruña, estrea mañá sábado ás 21.30 horas As varietés do Barriga verde, montaxe de produción propia que pretende reproducir, cunha óptica actual, os espectáculos que a familia Silvent realizaba na súa barraca de xeito previo á representación da obra de Barriga Verde.