Teo solicita ao Consorcio a construción dun parque comarcal de bombeiros

27-04-2017
O alcalde de Teo, Rafael Sisto, asinou esta mañá xunto cos rexedores de Ames, Boqueixón, Brión, Val do Dubra e Vedra, un documento no que lle solicitan ao Consorcio Provincial Contraincencios e Salvamento da Coruña a construción dun novo parque comarcal de bombeiros, a previsión de reserva de crédito nos orzamentos da Xunta e da Deputación da Coruña do vindeiro ano 2018 para a construción e dotación do novo parque e a celebración dunha reunión, o máis axiña posible, entre os alcaldes asinantes e os representantes do Consorcio, tanto da Xunta de Galicia como da Deputación da Coruña, para abordar os termos do futuro parque comarcalizado.

As anpas colaboran co Banco Veciñal de Alimentos nunha recollida de alimentos

27-04-2017
As anpas de Teo amosan unha vez máis a súa solidariedade. Desta volta cunha recollida de alimentos en colaboración co Banco Veciñal de Alimentos de Teo. Durante esta semana e ata o 30 de abril recolleranse alimentos nos colexios e no Auditorio Constante Liste. Segundo indican dende o propio banco os produtos máis demandados son leite, aceite ou conservas.

O Concello lamenta a decisión do Mercadona de non instalarse en Teo

26-04-2017

O Concello lamenta a decisión que vén de comunicar a firma comercial Mercadona, S.A. de non instalarse en Teo. Segundo un escrito presentado o 25 de abril esta empresa comunica a súa intención de desistir da solicitude de aprobación dun estudo de detalle que se estaba tramitando para permitir a súa ubicación nunha parcela na zona de Montouto.




Lolo Penas e Tina Fernández gañan na categoría absoluta da carreira Batalla de Cacheiras

22-04-2017

Lolo Penas e Tina Fernández convertíronse esta tarde nos gañadores da categoría absoluta da Carreira Popular Batalla de Cacheiras. Nunha xornada lúdica e festiva na que o deporte foi o protagonista case 600 persoas participaron nesta competición, xa sexa nas categorías escolares ou na dos/as adultos/as.



Música familiar con Pakolas na BPM do Grilo-Cacheiras este sábado

21-04-2017

O sábado 22 de abril ás 18 horas, como aperitivo do Día do Libro, poderemos desfrutar na Biblioteca do Grilo-Caheiras das "Parábolas de Pakolas". Trátase dun espectáculo no que Paco Cerdeira interpreta en directo unha escolla dos seus temas para público infantil, con música rock e máis estilos que entusiasman aos nenos e ás nenas. Combínanse as cancións coas historias que nelas se recollen cunha mensaxe final, formando así unha fermosa parábola da que aprender e na que pensar.


O Vives emprende organiza un taller sobre estudos de mercado

17-04-2017
O Vives Emprende organiza un taller de "Márketing: estudo de mercado" o mércores 19 de abril na aula de formación da Casa Común de Oza de 09:30 a 13:30 horas. As persoas interesadas en asistir a este taller poden contactar con Itziar Villar, a persoa encargada do mesmo, no teléfono 630 639 649 ou no seguinte correo electrónico: ivillar@accioncontraelhambre.org

O programa Teo30 resolve o concurso de fotografía "O meu Concello é Teo"

07-04-2017

No marco do programa Teo30 vense de resolver o concurso de fotografía O meu Concello é Teo co que se pretendeu activar unha mirada de orgullo da poboación sobre o seu Concello.

O xurado composto por 3 mulleres e un home (Fátima Seijo, Lucía Mosquera, Leticia Base e Xoán Soler) valorou a cegas cada fotografía considerando tanto aspectos técnicos como a súa representatividade do do Concello de Teo.