OS ALCALDES DE AMES E TEO REÚNENSE PARA VALORAR TEMAS DE INTERESE CONXUNTO PARA OS DOUS CONCELLOS

11-09-2015
Os alcaldes de Ames e Teo, José Miñones e Rafael Sisto, mantiveron esta mañá unha xuntanza institucional no Concello de Teo. Tratábase da primeira reunión logo do cambio nas alcaldías o pasado mes de xuño e serviu para pór en común temas de interese conxunto e acordar manter unha liña de comunicación fluída.

A ÚLTIMA PROBA DO CAMPIONATO DO MUNDO DE TRIAL PRESENTOUSE NO CONCELLO DE TEO

10-09-2015
Ás 12 horas deste xoves tivo lugar unha rolda de prensa na que o presidente do Club Motoclista Teo, Casimiro García, dirixiu un acto que contou coa presenza do secretario xeral para o Deporte, Lete Lasa, e o alcalde de Teo, Rafael Sisto. A competición desenvolverase nas xornadas do sábado e do domingo en 12 seccións que van do paddock, situado na Piscina Cuberta da Ramallosa ata os montes de Lampai.

O CONCELLO EXECUTA OBRAS DE MANTEMENTO NOS CENTROS ESCOLARES ANTES DO INICIO DO CURSO

10-09-2015
A concellaría de Educación, dirixida por Salomé Beiroa, realizou obras de mantemento durante o verán nos centros escolares. A maior parte do investimento adicouse ao pintado de estancias, aulas e elementos comúns como o comedor, en varios centros. Tamén se fixeron tarefas menores de mantemento eléctrico ou de fontanería así como limpeza ou desbroces dos patios.

A SEGURIDADE VIARIA DAS ESTRADAS PROVINCIAIS CENTRA A XUNTANZA ENTRE O ALCALDE DE TEO E O PRESIDENTE DA DEPUTACIÓN

09-09-2015
A seguridade viaria nas estradas provinciais foi o tema central da xuntanza entre o alcalde de Teo, Rafael Sisto (Son de Teo-Anova) e o presidente da Deputación da Coruña, Valentín González. Ao encontro tamén asistiu a concelleira de Urbanismo, Uxía Lemus (PSOE).

TEO CONVOCA AOS CONCELLOS DA COMARCA PARA TRABALLAR NUN PROTOCOLO CONXUNTO DE ACOLLIDA AOS REFUXIADOS

08-09-2015
O Concello de Teo mantinvo unha reunión con representantes de varios concellos da comarca para abordar a situación dos refuxiados e poder traballar nunha resposta de acollemento conxunta. O alcalde de Teo, Rafael Sisto, que fixo o convite a Compostela, A Estrada, Padrón, Trazo, Oroso, O Pino, Brión, Ames, Vedra, Boqueixón, Rois, Val do Dubra e Touro, destaca a necesidade de “traballar nunha estratexia intermunicipal de apoio e acolida de persoas refuxiadas na comarca en base ás capacidades e ao interese en facelo, escapando de anuncios demagóxicos nun tema tan serio”. “Con este paso tentamos alonxarnos de declaracións xenéricas coas que todos/as podemos estar dacordo que non serven de nada se logo non somos capaces de concretalas nunha oferta real” explica Sisto.

A CONCELLARÍA DE CULTURA RECUPERA AS ANDAINAS NOCTURNAS PARA COÑECER OS PETRÓGLIFOS DE TEO

08-09-2015
A concellaría de Cultura de Teo, dirixida por Pilar Faxil, recupera neste mes de setembro as andainas nocturnas para coñecer e pór en valor os petróglifos teenses. En colaboración co colectivo a Rula están programadas dúas rutas nocturnas guiadas para os próximos días 19 e 26 de setembro.

O CONCELLO CONVOCA UNHA BOLSA DE PRÁCTICAS PARA O ARQUIVO MUNICIPAL

07-09-2015
O Concello de Teo convoca unha bolsa de prácticas para tarefas de apoio no arquivo municipal, centrado no proceso de dixitalización de fondos municipais e na organización e descrición documental. A bolsa ten unha duración de 8 meses e poden participar nesta convocatoria as/os titulados/as universitarios/as licenciados/as ou graduados/as en Historia, licenciados/as en Humanidades ou graduados/as en Ciencias da Cultura e Difusión Cultural e os graduados/as en Información e Documentación ou Diplomados/as en Biblioteconomía e Documentación que rematasen os seus estudos con posterioridade ó primeiro de xaneiro de 2010.

O CONCELLO TRASLÁDALLE Á AXENCIA GALEGA DE INFRAESTRUTURAS AS SÚAS PRIORIDADES NA EXECUCIÓN DE SENDAS PEONÍS

05-09-2015
O Departamento de Urbanismos do Concello de Teo vén de enviarlle á Axencia Galega de Infraestruturas as súas prioridades para a execución de sendas peonís. A Xunta de Galicia comunicou a existencia de fondos para a execución deste tipo de obras, encamiñadas a minimizar o uso do vehículo particular.

O CONCELLO COMEZA A RECOLLER INFORMACIÓN SOBRE AS POSIBILIDADES DE ACOLLIDA DE REFUXIADOS QUE SE PODEN OFERTAR

04-09-2015
O Concello de Teo pon en marcha un proxecto para avaliar a capacidade de acollemento de refuxiados do que pode dispor en función das capacidades municipais e do interese da cidadanía por colaborar. Trátase dun primeiro paso de recollida de información sobre a dispoñibilidade de recursos que permita realizar unha proposta seria sobre as familias que poderían chegar a Teo, unha vez conseguiran o estatus de refuxiado.

O CONCELLO DE TEO ESTUDA VÍAS DE COLABORACIÓN CO COLEXIO DE ENXEÑEIROS INDUSTRIAIS

01-09-2015
O alcalde de Teo, Rafael Sisto (Anova), e a concelleira de Urbanismo, Uxía Lemus (PSOE), mantiveron esta mañá un encontro co delegado en Santiago do Colexio Oficial de Enxeñeiros Industriais de Galicia (ICOIIG), Fernando Blanco. Durante esta xuntanza na Casa do Concello exploráronse vías de colaboración entre as dúas entidades.