O Servizo de Bono Social Eléctrico pasará a prestarse todos os mércores en horario de 10:00 h a 12:00 horas no Salón de Plenos.
A corporación teense reúnese este martes 15 de decembro en sesión ordinaria. O debate terá lugar, como xa é habitual, en horario de tarde, ás 20:00 horas, para facilitar a asistencia das persoas interesadas e celebrarase no salón de sesións da Casa Consistorial, na Ramallosa. A sesión tamén se retransmitirá por streaming a través da web municipal, premendo no banner En directo, na marxe dereita da portada.
O tema que centrará gran parte da orde do día deste pleno será a aprobación dos plans de obras financiados pola Deputación da Coruña, POS 2016 e PAS 2015. O Concello de Teo diversificou as accións previstas co financiamento destes plans, que se achega ao millón de euros. Entre as obras previstas destaca o acondicionamento dun espazo de lecer nos Tilos, onde se prevé facer unha cuberta na praza circular deixando un espazo de esparcemento para maiores e pequenos ademais de ser o espazo no que se realiza o mercado labrego. A seguridade viaria coa mellora de vías, arranxo de núcleos e sendas peonís son outras das accións que se reparten nos dous plans. Tamén está previsto facer arranxos no local social de Francos (Calo), nos pavillóns dos Tilos e A Ramallosa ademais de arranxar a accesibilidade ao edificio da policía local e facer melloras na nave municipal que usan as brigadas municipais e o servizo de protección civil.
A orde do día ten os seguintes puntos:
- Aprobación da acta da sesión do 29/10/15.
- Dar conta das resolucións da alcaldía (da 906/15 á 992/15).
- Dar conta do cumprimento do artigo 104 BIS da lei 7/1985, do 2 de abril, en relación ao persoal eventual.
- Ditame da proposta da alcaldía de adhesión ao convenio entre a axencia estatal de administración tributaria e a federación española de municipios e provincias en materia de subministro de información de carácter tributario ás entidades locais.
- Ditame da proposta da alcaldía de aprobación da ordenanza reguladora do prezo público pola utilización dos servizos de conciliación da vida laboral e familiar.
- Ditame da proposta da alcaldía de aprobación do regulamento de funcionamento dos programas de conciliación do Concello de Teo.
- Ditame de proposta da alcaldía de aprobación do plan provincial de cooperación ás obras e servizos de competencia municipal (POS 2016).
- Ditame da proposta da alcaldía de aprobación do modificado técnico do proxecto “Afirmado e acondicionamento das estradas do Xirimbao e Loureiro” (POS complementario 2015).
- Ditame da proposta da alcaldía de aprobación do plan de acción social (PAS 2015).
- Ditame da proposta da alcaldía de aprobación do plan complementario de aforro e investimento (PAI complementario 2015).
- Ditame da proposta da alcaldía de recoñecemento da compatibilidade a D. José Luís Míguez Iglesias.
- Mocións.
- Rogos e preguntas.
