Nacidas libres, de Contraproducións no Auditorio Constante Liste

Nacidas libres no Auditorio Constante Liste

O venres 23 ás 21:30 no Auditorio Constante Liste, terá lugar a representación da obra Nacidas libres, de Contraproducións baixo a dirección de Cristina Domínguez e arredor dun texto de Cándido Pazó. Nel, catro actrices que atravesan esas idades nas que corren o risco de desaparecer do mundo do espectáculo, fartas de non recibir ofertas de traballo, deciden autoempregarse e montar unha peza, xuntándose nunha aula de cultura, hai anos pechada, dunha entidade bancaria que hai anos cambiou de nome. En vista de que non topan textos para catro mulleres, aventúranse a promovelo elas, encomendándollo a unha xove escritora que vive emigrada, partindo dunha noticia aparecida nos xornais: A policía rescata tres monxas indias retidas contra a súa vontade nun convento de clausura en Santiago. Con esa inspiración van argallando un espectáculo en múltiples planos no que, con rigor e obxectividade, pero con frescura, dinamismo, emoción e pinceladas de humor, entran no entramado argumental do caso, pero tamén en múltiples reflexións e referencias a diversos temas vistos desde a perspectiva de xénero: a desigualdade, a ilusión da liberdade, os condicionantes da muller nas distintas culturas, a emigración..

A entrada é de balde ata completar aforo