As Toupas de Teo acudirán ao IV Encontro Galego de Consellos de Participación infantil e adolescente

Esta fin de semana terá lugar o IV Encontro Galego de Consellos de Participación infantil e adolescente, baixo o lema “Promovendo os dereitos da infancia e a adolescencia na contorna dixital”. Celebrarase na Residencia de Tempo Libre de Panxón, no concello pontevedrés de Nigrán. Os representantes das Toupas de Teo que acudirán serán Álex, Ainoa, Ariadne, Amanda, Aurelio e Eloy. 

O dereito sobre o que se traballará este curso é o dos dereitos dixitais, en pleno debate sobre a Lei galega de acoso e violencia dixital, exposta a consulta pública desde o 16 de setembro.

Desta forma, permitiralles tamén poder opinar no debate actual en torno á lei galega de acoso e violencia dixital. Tal e como indica UNICEF, protexer os dereitos da infancia neste ámbito resulta fundamental para que os nenos e nenas poidan desenvolverse na esfera dixital de xeito seguro e protexidos. Esta é a temática proposta tamén desde UNICEF para conmemorar o Día Mundial da Infancia, que se celebra o vindeiro 20 de novembro.

Ao longo de todo o trimestre, o FoPIA tamén participará en varios actos promovidos pola Xunta de Galicia e UNICEF, como o XIII Foro infantil do Parlamento de Galicia ou as VI Xornadas de Cidades Amigas da Infancia de Galicia.