NA PROCURA DOS CRUCEIROS TEENSES. RUTA INTERPRETATIVA

Visita guiada polo Colectivo A Rula para dar a coñecer algúns dos cruceiros teenses de maior significación polo seu valor artístico, singularidade ou antigüidade. Un percorrido no que falaremos da orixe, características principais e tipoloxías destes bens culturais considerados como os monumentos relixiosos e etnográficos máis representativos da arte popular en Galiza. 
Visitaremos 7 das 80 cruces e cruceiros espallados polas 13 parroquias de Teo (49 deles catalogados). Dedicaremos especial atención ós cruceiros restaurados recentemente, dando conta dos traballos realizados e singularidades destes monumentos centenarios.
O punto de encontro será no adro da Igrexa de Santa María de Teo na parroquia de Teo, e a ruta rematará en Francos, ao pé do cruceiro gótico de Francos, considerado un dos máis antigos de Galicia (s. XIV - XV) e descrito por Castelao na súa derradeira obra “As cruces de Pedra na Galiza (1950)”

Duración aproximada: 3-4 horas

Nivel de dificultade: baixo