Festival Atlántica: "Contos Colorados: en boca de muller"

Contos Colorados: en boca de muller é unha viaxe de volta á raíz, alí onde a retranca e o desexo se atopan arredor do lume ou na intimidade da lareira. Vero Rilo e Ángeles Goás recollen a testemuña das nosas antepasadas para poñer voz a historias que, durante moito tempo, foron contadas en voz baixa.

A través dunha selección coidada de relatos da tradición oral, este espectáculo celebra o erotismo visto e contado desde unha perspectiva feminista. Aquí o pracer non é un tabú, senón un motor de vida, liberdade e, por suposto, moito humor. Unha sesión para rir, sentir e recoñecernos nunha memoria colectiva que reivindica o corpo e a palabra sen censuras.

Vero Rilo e Ángeles Goás son dúas voces ben coñecidas da escena oral galega. Cun estilo que combina a creación contemporánea coa inspiración nas fontes tradicionais, ambas desenvolveron unha sólida traxectoria en festivais, bibliotecas e espazos escénicos de todo o país. Cando se xuntan, a complicidade e a experiencia compartida tradúcense nunha proposta chea de humor, sensibilidade e oficio. Dúas maneiras de entender a palabra que dialogan sobre o escenario para crear unha experiencia próxima e viva, desas que convidan a escoitar, emocionarse e deixar que as historias fagan o seu camiño.

Público adulto

Data: venres 3 de xullo 

Hora: 21:00h 

Lugar: Casa Común Marisa Mirás

Acceso libre