180 ANIVERSARIO DA BATALLA DE CACHEIRAS. DESFILE POPULAR E RECREACIÓN HISTÓRICA

Data e hora

25/04/2026 - 11:30

Localización

Punto de encontro e inicio do desfile: No monumento a Ánxel Casal na Travesía de Montouto, Cacheiras, Teo

Como chegar

O Concello de Teo celebra o 180 aniversario da Batalla de Cacheiras cunha proposta única que convida á veciñanza a formar parte da historia.

A actividade comeza cun desfile popular desde o Monumento a Ánxel Casal ata o Alto de Montouto, no que persoas de todas as idades acompañarán ás tropas nun percorrido simbólico cara ao campo de batalla, convertendo o espazo público nun escenario vivo.

No cumio de Montouto, a memoria cobra vida cunha recreación histórica ao aire libre que revive os acontecementos de 1846, combinando palabra, música e movemento nunha experiencia colectiva e emocionante. A dirección escénica e a narración corren a cargo do actor, historiador Suso Martínez, que conducirá o público a través dun relato cheo de significado para a historia de Galicia.

O evento conta coa participación da Asociación Cultural e Teatral Abril de Lume e Ferro de Carral, a Aula de Teatro do IES Cacheiras, a Asociación Cultural Entroido de Cacheiras, a Banda de Música da SR de Calo, así como doutras asociacións e persoas que se suman a esta celebración compartida.

Unha oportunidade para sentir, lembrar e vivir a historia en comunidade.

Observacións

Duración total: 2 h aprox
Duración do percorrido: 15–20 minutos
Participación e público destinatario: Actividade aberta á cidadanía, dirixida ao público xeral, familias e persoas interesadas na historia, cultura e patrimonio de Galicia.
Recoméndase a participación con caracterización histórica e acudir con antelación para seguir o desfile ou situarse na zona da recreación.
Actividade ao aire libre suxeita ás previsións meteorolóxicas