O Servizo de Bono Social Eléctrico pasará a prestarse todos os mércores en horario de 10:00 h a 12:00 horas no Salón de Plenos.
Teo conta xa coa figueira de Rosalía de Castro no parque de Luou. Este 23 de febreiro, data na que se lembra no nacemento da escritora, fíxose a plantación dun fillo da figueira que está na Casa da Matanza, en Padrón. No acto, celebrado sobre as dúas da tarde, participaron Anxo Angueira, presidente da Fundación Rosalía, a poeta Luz Fandiño, o alcalde, Rafael Sisto e María López, concelleira de Cultura. Tamén estiveron presentes concelleiras do Partido Popular de Teo e pechou a música do grupo Os Herdeiros da SR de Calo.
Durante a plantación Angueira destacou a vinculación do Concello de Teo coa figura de Rosalía destacando o poema “Miña Santa Margarida, Miña Margarida Santa” do libro Cantares Gallegos e que pode facer referencia á Santa Margarida de Luou. Explicou Angueira que a vinculación do Concello coa figura da nosa poeta máis recoñecida se ten demostrado nas celebracións destes días a través das alboradas, o caldo de gloria e diferentes iniciativas nos últimos anos. Teo tamén é mecenas da Fundación Casa Rosalía que coida e difunde o legado da escritora.
O acto contou coa presenza da poeta Luz Fandiño subliñou a rebeldía de Rosalía e recomendou adentrarse na obra de Rosalía e facelo necesariamente a través de tres poemas: A xustiza pola man, Castellanos de Castilla e O son da gaita galega.
O alcalde, Rafa Sisto, quixo salientar o labor que desenvolve a Fundación Casa Rosalía "e o apoio que lle dá aos concellos para que perdure a obra rosaliana e que deste xeito perdure a súa rebeldía, o seu feminismo e a sús dignidade".
Serán Rosaliano o 26 na Ramallosa
Despois do acto de hoxe nos próximos días o Concello seguirá honrando a Rosalía. O sábado organiza un Serán Rosaliano no que se vinculará a obra da autora con Teo. A función contará coa presenza de Tero Rodríguez, da compañía Os Quinquilláns, que será a mestra de cerimonias. No acto participarán os grupos de teatro municipais, tanto os de persoas adultas coma os de mocidade. Así mesmo haberá música con Xoán Curiel e a Asociación Rosalía de Castro de Cacheiras, e teremos algunha sorpresa relacionada coa ilustración da man de Raquel Germeade e mesmo co caldo de gloria.
A gala será o sábado 26 ás 18:00 horas no Auditorio Municipal da Ramallosa e para asistir haberá que inscribirse a través do formulario en liña premendo aquí.
O poema de Santa Margarida de Rosalía de Castro
Dende o Arquivo municipal achégannos unha imaxe do fondo local do poema Santa Margarida. "No día que conmemoramos o nacemento da nosa poetisa universal é bo lembrar a súa probable presenza na romaría de Santa Margarida de Luou, “avogosa das verrugas”, de grande tradición en toda contorna dende tempos inmemoriais. Dá testemuño o poema “Miña Santa Margarida, Miña Margarida Santa” que pecha o libro de “Cantares Gallegos” publicado o 17 de maio de 1863, a coñecida data que marca a referencia da celebración do Día das nosas letras" explica o arquiveiro, Pablo Sanmartín. Nun pequeno folleto editado nos anos oitenta, que custodia o arquivo municipal, recóllese o poema xunto coa imaxe da santiña de Luou, venerada inicialmente na capela de Loureiro e posteriormente na igrexa parroquial.
Imaxe: Fondo local do Arquivo Municipal (Doazón A.P.)
