O Servizo de Bono Social Eléctrico pasará a prestarse todos os mércores en horario de 10:00 h a 12:00 horas no Salón de Plenos.
A policía local de Teo, no traballo de control do cumprimento da normativa sanitaria vixente, denunciou a varias persoas este pasado domingo por incumprir o peche perimetral e a prohibición de reunirse con persoas non convivintes.
O 31 de xaneiro pola tarde o persoal de servizo recibiu aviso sobre a celebración dunha xuntanza nun domicilio no lugar de Catro Camiños, na parroquia de Oza, onde se supoñía que había un grupo grande de xente. A patrulla achégase á zona indicada e os axentes observan varios vehículos estacionados ao carón da vivenda. Pola matrícula puideron comprobar que non correspondían a veciños/as do Concello de Teo.
Os axentes identificaron a dez persoas adultas, segundo foron saíndo da vivenda e foron denunciados. Estaban ademais acompañados de nenos/as. As persoas denunciadas eran de fóra do Concello polo que incumprían a obriga de non saír do seu perímetro e tamén estaban con outras persoas coas que non conviven. Recoñecéronlle á policía que se xuntaran para a celebración dun cumpreanos.
Dende a policía local destácase o bo nivel xeral de cumprimento da veciñanza pero alertan de que este tipo de comportamentos non se poden tolerar e que se manterán vixiantes.
