TEO ENTRE VIÑEDOS (segunda quenda): Paseo vitivinícola con degustación harmonizada

Chega unha nova oportunidade para descubrir a tradición vitivinícola de Teo, o territorio da Denominación de Orixe Rías Baixas máis próximo a Santiago de Compostela.

Vente con nós a pasear entre viñedos, coñecer diferentes formas de entender e traballar a terra e, sobre todo, poñerlle cara ás persoas que están detrás desta paisaxe e desta cultura do viño.

Nesta segunda quenda de Teo entre viñedos percorreremos tres das sete parroquias teenses integradas na subzona Ribeira do Ulla:

• Rarís, onde nos achegaremos aos viñedos de Mar de Envero e Viñas Marecaste.
• Santa María de Teo, cun percorrido por diferentes paisaxes vitícolas da parroquia.
• Oza, onde remataremos entre os viñedos de Gómez & Rial.

Ao longo do camiño descubriremos as particularidades da viticultura atlántica e unha paisaxe construída durante xeracións arredor da vide. Coñeceremos distintas maneiras de cultivar, coidar e interpretar o viñedo, desde pequenos proxectos familiares e de autor ata outros modelos de produción a maior escala.

Pero, sobre todo, achegarémonos ás historias, aos saberes e ás persoas que fan posible que a viticultura siga viva neste territorio.

A experiencia rematará no propio viñedo, cunha degustación de viños harmonizada cunha cata guiada de queixos galegos da man de Salomé Beiroa. Un final para gozar sen présas dos aromas, dos sabores e da paisaxe da Ribeira do Ulla.

Importante: a experiencia está centrada exclusivamente na paisaxe vitícola e nos viñedos; non inclúe a visita ao interior das adegas.

Organización e punto de encontro

O punto de encontro será en Cachóns ás 10.30 h, nun lugar que se comunicará previamente ás persoas inscritas e onde poderán deixar os seus vehículos.

Desde alí, o desprazamento entre os distintos puntos do itinerario realizarase en microbús, facilitando unha experiencia cómoda, segura e sostible.

A actividade rematará novamente en Cachóns, a poucos minutos a pé dos vehículos.